Hnúfubakur velti næstum bát íslenskrar konu

Henni brá nokkuð í brún hinni íslensku Sögu Svavarsdóttur, þegar hún var í kajaksiglingu í Grjótfirði í Tromsø síðasta sunnudag. Þá bar þar að stærðar hnúfubak sem kominn var upp úr kafi. Hvalurinn rak sig í bátinn hennar og minnstu munaði að honum hvolfdi. Hvalnum tókst að snúa bátnum í 90 gráður, eftir því sem fram kemur á vef norska blaðsins VG.

Saga og vinir hennar höfðu heyrt að flóinn væri fullur af hnúfubökum en þeim hafði ekki órað fyrir því að þau gætu komist í svo rosalegt návígi við hvalinja þegar þau komu sér fyrir á ferðalagi sínu, rétt áður en þau fóru út á kajak. „Um leið og við komum út úr bílnum heyrðum við í hvölunum,“ segir Saga í samtali við VG. Þau fóru svo á kajak daginn eftir.

Þegar þau voru komin á kajak sáu þau hvar hnúfubakur var rétt við þau. En þeim brá þegar hvalurinn synti ekki framhjá þeim heldur kom upp úr kafi undir þeim. „Hnúfubakurinn rekur sig upp undir kajakinn minn og snýr honum í 90 gráður,“ segir Saga. Hún viðurkennir í samtali við blaðið að hún hafi verið svolítið skelfd eftirá. 

Sjón er sögu ríkari. Horfðu á myndbandið hér að neðan til að sjá hnúfubakinn.