Melrakkinn þjóðardýr Íslendinga

Melrakkasetur Íslands í Súðavík stefnir að því að gera melrakkann að þjóðardýri Íslendinga. Á fréttavefnum BB.is er vitnað í ársskýrslu setursins en þar kemur fram að unnið verði að því leynt og ljóst enda nokkurn veginn í höfn að tófan sé orðin einkennisdýr Vestfjarða.

Þá segir að melrakkinn sé ekki eingöngu frumbyggi landsins, heldur sé hann einnig þeim kostum búinn sem okkur sjálfum þykja eftirsóknarverðir.

Hann ástundi heilbrigða lifnaðarhætti og sýni hófsemi þegar nóg sé af öllu, en bjargi sér með hyggindum og hófsemi þegar kuldi og hungur sverfi að.