Til ákæruvalds með haustinu

Til stendur að senda mál Annþórs Kristjáns Karlssonar og Barkar Birgissonar, sem grunaðir eru um manndráp á Litla-Hrauni, til ákærumeðferðar hjá Ríkissaksóknara „með haustinu", eins og það er orðað hjá lögreglunni á Selfossi sem annast rannsókn málsins.

Enn er beðið eftir endanlegri niðurstöðu úr krufningu Sigurðar Hólm Sigurðssonar, sem fannst látinn í klefa sínum á Litla-Hrauni um miðjan maí. Bráðabirgðaniðurstaða hennar gaf til kynna að hann hefði látist af völdum áverka sem honum hefðu verið veittir af mannavöldum.

Rannsóknin er í fullum gangi, að sögn Elísar Kjartanssonar hjá rannsóknardeild lögreglunnar á Selfossi. Hún hefur verið mjög umfangsmikil, tugir hafa verið yfirheyrðir, bæði úr fangelsinu og utan þess, og málskjölin fylla að hans sögn heila hillu.

Skammt er síðan Héraðsdómur Suðurlands, og í kjölfarið Hæstiréttur, féllst á að leyfa sumum vitnum í málinu að njóta nafnleyndar þegar og ef til þess kemur að þau gefi skýrslu fyrir dómi.- sh

Athugasemd klukkan 12:

Hólmgeir Elías Flosason, verjandi Annþórs, vill koma því á framfæri að bráðabirgðaniðurstöður krufningar hafi ekki endilega bent til þess að Sigurður hafi látist af mannavöldum. Þær sýndu að Sigurður lést af innvortis blæðingum sem líklega stöfuðu af þungu höggi. Ekki er hægt að fullyrða að þetta þunga högg hafi verið af mannavöldum.