Hollusta í Grasagarðinum en subbufæði í miðbænum

Hinn árlegi beikondagur er haldinn í annað sinn í dag á Skólavörðustíg frá kl. 14 - 17 og á KEX Hostel í kvöld frá kl. 19-23. Í orðsendingu frá aðstandendum hátíðarinnar segir að boðið verði upp á beikon-innblásna rétti frá Snaps, Sjávargrillinu og Þremur frökkum. Þá er fólk hvatt til þess að dansa og gleðjast saman undir beikon-innblásnum tónum frá hljómsveitinni Klaufum, en einnig verður boðið upp á Beikon-kappát og aðrar beikonuppákomur.

Hollustan verður hins vegar ríkjandi í Grasagarðinum á sama tíma því þar fer fram hin árvissa uppskeruhátíð garðsins milli klukkan eitt og þrjú í dag. Garðyrkjufræðingar munu kynna ræktun, nýtingu og geymslu matjurta fyrir gestum sem verður einnig boðið að bragða á nýuppteknu grænmeti úr garðinum, ljúffengri grænmetissúpu og grasatei úr lækningajurtum.

Athugasemd:

Aðstandendur Beikonhátíðarinnar vilja koma því á framfæri að á Skólavörðustígnum verða landsins færustu kokkar að matreiða dýrindis rétti. Þess vegna telja þeir „subbufæði" tæplega viðeigandi orð, jafnvel þó hráefnið sé beikon.