Svigrúm til lækkunar eldsneytisverðs

Talsmenn íslensku olíufélaganna segja að félögin hafi verið búin að lækka álagningu niður úr öllu valdi áður en heimsmarkaðsverðið fór að lækka í dag, þannig að það sé ekki fyrr en upp úr þessu að svigrúm skapist til lækkunar hér á landi.

Álagning félagana á hvern bensínlítra er að meðaltali á bilinu 25 til 27 krónur.

Vegna gríðarlegra hækkana á heimsmarkaði fyrir nokkrum vikum, drógu félögin úr álagningu niður fyrir 20 krónur á lítrann og var það staðan áður en heimsmarkaðsveðið fór að lækka á ný.

Það hafði því skapast hækkunarþörf, eins og olíufélögin orða það, en hún sé um það bil horfin og nú fari að skapast svigrúm til lækkunar.

Reyndar reið Atlantsolía á vaðið snemma í morgun og lækkaði Dísilolíuna um þrjár krónur og kostar lítrinn nú rúmar 248 krónur. Orkan og ÓB fylgdu í kjölfarið með sömu lækkun.

Það tefur hinsvegar fyrir lækkunum nú, að krónan veikist jafnt og þétt gagnvart dollar. Þannig væri bensínverðið 12 til 13 krónum lægra en það er nú, ef gengi krónu gagnvart dollar væri það sama nú og það var í desember síðastliðnum. Þessi þróun heldur áfram og í gær rauf dollarinn 120 króna múrinn.