Hátt í 200 milljón króna lán fór í gistiheimilarekstur

Íbúðalánasjóður veitti 192 milljóna króna lán til leigufélags sem síðan nýtti lánið til gistihúsareksturs. Slík starfsemi er ekki lánshæf samkvæmt reglum Íbúðalánasjóðs. Þær upplýsingar fengust hjá sjóðnum að hann hafi ekki vitað annað en að leigumiðlun ætti að fara fram í húsinu og aldrei hafi verið tilkynnt um að breytingar hafi orðið á þeirri starfsemi.

Árið 2010 fékk Rent-leigumiðlun lán frá Íbúðalánasjóði til að kaupa fasteignina á Vatnssíg 11. Alls fékk félagið lánaðar 192 milljónir til 50 ára til kaupanna. Lánakjörin voru hagstæðari en víðast þekktist á markaði á þeim tíma þar sem það leit út fyrir að lántakandinn mynd starfrækja leigumiðlun í húsnæðinu.

Þannig nýtti hann sér heimild sem Íbúðalánasjóður hefur til að fjármagna starfsemi sem er til þess fallin að styrkja leigumarkaðinn hér á landi auk þess sem lánakjörin eru ætluð til bygginga eða kaupa á húsnæði sem tilheyra félagslegum úrræðum svo sem sambýlum, dvalarheimilum, vistheimilum og svo framvegis.

Starfsemin sem Rent-leigumiðlun stendur fyrir í húsnæðinu sem Íbúðalánasjóður lánaði fyrir á lítið skylt við félagsleg úrræði, og þar er svo sannarlega ekki rekin nein leigumiðlun. Í húsinu við Vatnsstíg er rekið gistiheimili. Eins og sést hér á heimasíðu gistiheimilisins Welcome.is eru 25 fullbúnar íbúðir til leigu fyrir ferðamenn en nóttin næsta júlí kostar til dæmis um 23-28 þúsund krónur og ekkert virðist laust nú í desember.

Íbúðalánasjóði er ekki heimilt að lána fé til reksturs af þessu tagi, hvað þá á þeim kjörum sem lánað var á. Þau svör fengust hjá Íbúðalánasjóði aðsjóðurinn hefði ekki fengið fengið upplýsingar um að reka ætti Vatnsstíg sem gistiheimili enda hefði kaupandinn kallast Rent-leigumiðlun. Íbúðalánasjóði hefði ekki borist tilkynning um breyttan rekstur.

Þau svör fengust hjá eigendum Rent-leigumiðlunar að svokallaður blandaður rekstur væri stundaður í húsinu, unnið væri að endurfjármögnun lánsins sem væri ekki mjög hagstætt, ekki fengust svör við því hve lengi reksturinn í húsinu hafði verið með þessum hætti.