Eðlilegt að fólk velti kostnaðinum fyrir sér

Guðmundur Magnússon, formaður Öryrkjabandalags Íslands, segir það sé hluti af starfi bandalagsins að fara í auglýsingaherferðir, eins og þá sem var farið í í gær í sambandi við gjörning á Austurvelli þar sem markmiðið var að vekja athygli á fáttækt í landinu. Hann segist ekki vera með það á hreinu hver kostnaðurinn við þetta sé.

Í gær birti Öryrkjabandalagið heilsíðuauglýsingar í dagblöðum, sérprentaði gula borða, leigði hljóðkerfi og fékk auglýsingastofu til að hanna gjörninginn á Austurvelli. Þá sá almannatengslastofa um kynningu í fjölmiðlum. Gera má ráð fyrir því að kostnaðurinn við þetta hlaupi á nokkrum milljónum.

„Þetta er bara hluti af því sem okkur ber að gera," segir Guðmundur í samtali við fréttastofu. Spurður hvort að þetta hafi kostað nokkra þúsund kalla, segir hann það svo vera. „Jú að sjálfsögðu, þú veist það sjálfur, svona heilsíðuauglýsing kostar. Það er bara þannig að það verður að gera það til að ná eyrum og augum fólks, sérstaklega þessa ráðamanna. Við höfum ekki fengið svo mikla fjölmiðlaathygli, það var einhver sem sagði: Afhverju var ekki talað meira um þetta þegar skerðingarnar voru? En við reyndum þá, mótmæltum, sendum ályktanir á fjölmiðla," segir Guðmundur og tekur fram bandalagið hafi fengið lítil viðbrögð.

En finnst honum eðlilegt að öryrkjar, og aðrir, velti því fyrir sér hvort að bandalagið eigi að eyða milljónum í auglýsingakostnað fyrir gjörning eins og þennan? „Auðvitað er það eðlilegt, það á vera svoleiðis. Við erum nýbúin að halda aðlfund þar sem allir reikningar voru samþykktir - þetta er bara inni í okkar fjárhagsáætlun. Það er eðlilegt að fólk velti þessu fyrir sér, við rekum bandalagið af skynsemi og aðhaldi og höfum alltaf gert," segir hann.

Þetta er ekki í fyrsta skiptið sem Öryrkjabandalagið fer í auglýsingaherferð líkt og þessa í gær. „Við fórum í ansi mikla kynningu í haust, það voru einhverjar milljónir sem fóru í það. Þetta er bara hluti af því sem okkur ber að gera."

Hann segir að ekki sé búið að taka til hvað auglýsingaherferðin í gær hafi kostað. „Það er ekki búið að gera það upp og það er ástæðulaust að setja tölur út í loftið, en það voru ekki margar milljónir," segir hann. „Það var mikið af sjálfboðaliðum sem unnu að þessu og margir sem komu og unnu störfin í kringum gjörninginn í gær. En það var hönnunarkostnaður á auglýsingum og annað sem aldrei verður hjá komist - ef maður ætlar að gera hlutina vel," segir hann að lokum.

Frétt Stöðvar 2 frá því í gærkvöldi.