20 stiga hiti í Borgarfirði

Um og yfir tuttugu stiga hiti hefur mælst á veðurstöðvum í Borgarfirði og á Mýrum í dag. Hæstur hefur hitinn mælst á Hvanneyri, 20,5 gráður, en í Húsafelli og á Fíflholtum á Mýrum 20,1 gráða.

Vestan- og norðvestanvert landið, sem og uppsveitir Suðurlands, hafa vinninginn í hitatölum dagsins. Þannig mældust 18,3 gráður á Bláfeldi á sunnanverðu Snæfellsnesi, 18,1 gráða í Ásgarði við Sælingsdal í Dölum, á Patreksfirði 17,5 gráður, á Hólum í Dýrafirði hefur hitinn náð 16,5 gráðum og á Blönduósi einnig 16,5 gráðum.

Sunnanlands hafa hitatölur dagsins mælst hæstar á Þingvöllum, 17,5 gráður, á Hjarðarlandi í Biskupstungum, 17,3 gráður, og í Búrfellsstöð í Þjórsárdal, 17,2 gráður, samkvæmt mælingum Veðurstofu Íslands.

Í Reykjavík hefur hitinn komist í 14,3 gráður í dag.

Ágæt hlýindi mælast einnig á veðurstöðvum á hálendinu norðan jökla, og voru um 16 gráður á Auðkúluheiði, á Kolku við Blöndulón og í Svartárkoti ofan Bárðardals.