Fjöldi manna leitar að þúsundum kinda í dag

Almannavarnadeild ríkislögreglustjóra lýsti í gærkvöldi yfir neyðarstigi í Þingeyjarsýslum vegna óveðursins sem gengið hefur yfir landið. Talið er að 10 til 12 þúsund kindur séu fastar upp á fjöllum vegna fannfergis. Hættustigin hjá Almannavarnardeild eru þrjú, óvissu-, hættu- og neyðarstig.

Í gær voru sex björgunarsveitir við leit að fé í Mývatnssveit. Leitað var á fjórum bæjum og þar af fullleitað á þremur. Í dag verður leit kláruð á fjórða bænum en björgunarsveitamenn hefja leit strax í birtingu. Ekki er vitað hversu mörgum kindum var bjargað en ljóst að þær skipta hundruðum.

Ein sveit var við störf á Vaðlaheiði og í Flateyjardal í gær og fram á kvöld. Einnig fór hópur björgunarsveitamanna á Þeistareyki, þar sem ástandið er einna verst, til að grafa fé úr fönn og taka stöðuna. Björgunarsveitamenn á þremur snjósleðum aðstoðuðu svo RARIK við viðgerð á rafmagnslínum. Alls voru um 80 manns frá björgunarsveitum við vinnu á svæðinu í gær að því er fram kemur í tilkynningu frá Landsbjörgu.

Meginþungi aðgerða í dag verður á Þeistareykjum, þar sem um 6000 kindur eru úti. Óttast er að mikið af þeim sé undir snjó en svæðið er úfið og erfitt yfirferðar. Vegurinn að Þeistareykjum var mokaður í gærkvöldi svo hægt sé koma tækjum á staðinn nú í morgunsárið. Sömu björgunarsveitir og voru við vinnu í dag munu sinna verkinu auk þess sem sveitir af Austfjörðum munu aðstoða. Þá segir Landsbjörg að verið sé að skoða hvort þörf sé á hjálp frá öðrum landssvæðum.