Vilja hækka eftirlaunaaldur

Stjórnvöld hafa átt í viðræðum við stéttarfélög opinberra starfsmanna um stórtækar breytingar á lífeyriskerfi þeirra.

Samkvæmt heimildum Fréttablaðsins er meðal annars rætt um að hækka eftirlaunaaldur þeirra úr 65 árum í 67 ár og breyta áunnum lífeyrisréttindum á þann veg að þau verði línuleg, líkt og er í almenna kerfinu. Gangi þetta eftir mun ríkissjóður greiða háa upphæð í bætur inn í opinbera kerfið, enda ljóst að lífeyriskjör opinberra starfsmanna myndu skerðast til lengri tíma frá því sem nú er.

Viðræðurnar hafa staðið yfir um nokkurt skeið og eru á viðkvæmu stigi, samkvæmt heimildum Fréttablaðsins. Gangi þær eftir mun frumvarp um breytingar á kerfinu verða lagt fram í haust.

Ef samningsviðræðurnar skila þeim árangri sem vonast er til mun það leiða til þess að eitt lífeyrissjóðakerfi verður í landinu í stað tveggja eins og nú er. Þá myndi ríkja jöfnuður á milli þeirra sem greiða í lífeyrissjóð.

Nú er staðan hins vegar sú að komi í ljós við tryggingafræðilega athugun að iðgjald sjóðsfélaga hjá Lífeyrissjóði starfsmanna ríkisins (LSR) dugar ekki til greiðslu á skuldbindingum skuli framlag launagreiðenda hækka í samræmi við þá athugun. Sá launagreiðandi er ríkið og því er í reynd ríkisábyrgð á lífeyrisréttindum opinberra starfsmanna.

Hallinn á A-deild LSR nam 57,4 milljörðum króna um síðustu áramót. Hann jókst um rúmlega tíu milljarða króna á síðasta ári. Því er ljóst að A-deildin, sem sett var á fót árið 1997, er ekki sjálfbær. Auk þess þyrfti að setja um 17 milljarða króna inn í B-deild sjóðsins til þess að hún gæti staðið við skuldbindingar sínar.