Tæplega 400 leigjendur eiga í vandræðum með framfærslu

Fjöldi leigjenda er í vanda með að standa undir framfærslu sinni, samkvæmt upplýsingum frá umboðsmanni skuldara. Alls telur stofnunin að 341 leigjandi hafi litla sem enga greiðslugetu. Við það bætast 53 sem eru í félagslega leigukerfinu.

Svanborg Sigmarsdóttir, upplýsingafulltrúi umboðsmanns skuldara, segir að stofnunin reikni leiguverð inn í framfærslukostnað en ekki afborganir á fasteignalánum. Svanborg segir því að fjöldi leigjenda í þessari stöðu sé því líklega aðeins ofmetinn.

„Megnið af leigjendum er á mörkum þess að vera undir framfærsluviðmiðum. Ef þeir spara í matarinnkaupum tekst þeim að halda sér fyrir ofan mörkin.“

Umboðsmaður varaði við því í vor að um 200 fjölskyldur gætu misst húsnæði sitt vegna greiðsluvanda. Fundað hefur verið með velferðarráðherra og stærstu sveitarfélögunum um málið. Fréttablaðið óskaði upplýsinga um fjölda þeirra sem leitað hafa til umboðsmanns skuldara en misst húsnæði sitt.

Stofnunin hefur gert 1.024 samninga og af þeim 619 sem hafa verið yfirfarnir núna eru 62 tilfelli þar sem fólk hefur þurft að setja hús sitt á sölu.

Svanborg segir þetta ekki alveg tæmandi lista, en um 10 prósent þeirra sem leita til stofnunarinnar fá synjun um samninga.

„Mjög algengt er að fólk hafi ekki skilað inn skattframtali eða gögnum. Sumir eru með atvinnurekstur og hafa ekki skilað inn gögnum hvað hann varðar. Annar hópur sem fær synjun skuldar of mikinn virðisaukaskatt.

Þá er í sumum tilfellum auðsjáanlegt að viðkomandi hefur ekki haft greiðslugetu þegar lánið var tekið.“kolbeinn@frettabladid.is