Rottur sjást oftar á vorin

Á þessum tíma árs verða borgarbúar iðulega meira varir við rottugang en á veturna. Ómar F. Dabney, rekstrarfulltrúi hjá meindýravörnum borgarinnar segir ekkert óeðlilegt við það.

„Á þessum árstíma fer fólk að taka til í görðunum og þá koma í ljós holur og fólk verður vart við þessi dýr," segir Ómar. Hann segir mikilvægt að fólk hringi samstundis í meindýravarnir borgarinnar ef vart verður við rottur. Þá er meindýraeyðir sendur á svæðið.

„Því fyrr sem við fáum að vita um dýrið þeim mun betra. Þá er meiri möguleiki að við náum kvikindinu," segir Ómar. „Það er t.d. mjög slæmt ef rotta sést á fimmtudegi en við fáum ekki ábendingu fyrr en á mánudegi."

Ef það er rottugangur einhvers staðar þá er alltaf hægt að tengja það við bilun í skolplögn eða ef rist vantar á niðurfall eða eitthvað þess háttar.

Yfir sumarið gerir Reykjavíkurborg út hópa sem eitra ofan í holræsabrunna borgarinnar. Eftir að það fer á stað og eitrið byrjar að virka á rotturnar þá koma þær gjarna upp á yfirborðið. „Þá standa þær bara og fólk getur gengið að þeim og jafnvel tekið þær upp," segir Ómar og ræður fólki að aflífa dýrin ef það fær tækifæri til.