Laumufarþegi fannst um borð í skipi frá Íslandi

Laumufarþegi fannst um borð í rannsóknarskipinu Knorr, sem var á leiðinni frá Íslandi til Bandaríkjanna. Þetta staðfestir Kristín Völundardóttir, forstjóri Útlendingastofnunar í samtali við Vísi. Maðurinn fannst í fyrrakvöld. Talið er að þarna sé um að ræða hælisleitanda sem hafi verið hér á landi.

Fréttastofa ræddi við tvo flóttamenn á Fit Hostel á dögunum þar sem fram kom í máli þeirra að félagi þeirra væri á leið frá Íslandi um borð í skipi. Hópur flóttamanna hefur ítrekað á dögunum reynt að komast um borð í Eimskip en hafa hingað til fundist áður en skipið lagði úr höfn.

Björn Hólmsteinsson, talsmaður TVG Ziemsen Cruise Agency skipamiðlara, segir í samtali við fréttastofu að skipinu verði ekki snúið við. Það muni fara til Ameríku og maðurinn svo sendur heim.