Annþóri og Berki gert að víkja á meðan vitni gaf skýrslu

Annþóri Kristjáni Karlssyni og Berki Birgissyni var gert að víkja úr dómssal í morgun þegar eitt vitnanna gaf skýrslu í máli þeirra. Þetta var gert að kröfu saksóknara í málinu. Verjendur þeirra mótmæltu kröfunni. Eftir að skýrslutöku lauk var hlé gert á þinghaldi og verjendur fengu að ráðfæra sig við sakborninga og ákveða hvaða spurningum verður beint að vitninu. Verjendur munu síðan spyrja vitnið.

Ákvörðun dómarans um að Annþór og Börkur skyldu víkja úr salnum var tekin á grundvelli læknisvottorðs þar sem fram kemur að það yrði íþyngjandi og líklegt að hafa áhrif á skýrslugjöfina ef mennirnir tveir yrðu salnum á meðan skýrslugjöf stendur yfir.