Dýraníðið kært til lögreglu - Myndbandið fjarlægt af YouTube

Dýraverndunarsamband Íslands hefur tilkynnt hestakonu til lögreglu sem á myndbandi sást beita harkalegum aðferðum við tamningar. Netheimar loga þar sem hegðun konunnar er fordæmd.

Myndbandið er í raun um árs gamalt. Erlend hestakona setti það inn á Youtube og vakti það sérstaka athygli Íslendinga þar sem í myndbandinu heyrast orðaskipti á íslensku.

Anna Berg Samúelsdóttir, starfsmaður hjá Dýraverndarsambandi Íslands, segir að þar hafi sést óboðlegar aðferðir við tamningar. Hesturinn hafi verið mikið innbundinn og hreyfingar hans hamlaðar.

Í netheimum hefur fólk tjáð sig óhikað um konuna, kallað hana öllum illum nöfnum og jafnvel óskað henni líkamsmeiðingum. Dýraverndunarsambandinu hafa borist fjölda ábendinga vegna myndbandsins, sem nú hefur verið fjarlægt, þar á meðal upplýsingar um hvaða konu er að ræða.

„Já, við höfum það, og höfum tilkynnt það til lögreglu," segir Anna Berg. Til standi að rannsaka málið. „Þeir ganga í málið og ætla að rannsaka þetta. Það er síðan í þeirra höndum hver næstu skref eru. En það eru til fordæmi, það var birt myndband fyrir ekki svo löngu síðan af manni níðast á hesti og það varð til kæru og sekta," segir Anna.

Myndbandið hefur núna verið fjarlægt af YouTube.