Hreyfihamlaður ofurhugi klífur Hvannadalshnjúk

Leifur Leifsson, ungur maður sem hefur verið bundinn við hjólastól alla ævi, hefur æft níu til tíu sinnum í viku síðastliðna mánuði og styrkt hendur sínar í því skyni að komast upp á hæsta tind landsins.

Leifur hefur útbúið sérstakan sleða, meðal annars úr gömlu hjóli og varahlut úr skipi, til að komast upp á Hvannadalshnjúk. Hann hefur m.a. farið með honum upp á Snæfellsjökul og tryllitækið virkar þannig að band með akkeri er dregið fram um þrjúhundruð metra og fjallagarpurinn dregur sig áfram með handknúnu hjóli.

„Vöðvar sem þú ert með í fótunum eru meira en helmingi stærri en þeir vöðvar sem þú ert með í efri part líkamans. Ég vona bara að maður sé kominn í nægilega gott form," segir hann.

„Svo lengi sem ég get lagt af stað þá fer ég ekkert niður aftur fyrr en þetta er búið."

„Mér finnst gaman að ögra sjálfum mér og samfélaginu. Okkar helsta hindrun við að gera hluti er hugurinn."

Leifur heldur af stað á föstudag og býst við að ferðin geti tekið allt að tvær vikur en hann og samferðarmenn áætla að slá upp tjaldbúðum á næturnar. Enn vantar nokkra sjálfboðaliða, vant jöklafólk til að fylgja okkar manni upp á topp, og hvetur Leifur áhugasama um að hafa samband. Áhugasömum er bent á að skoða síðuna hreyfiafl.wordpress.com

„Ég get lofað tjaldútilegu, mat og mögulega uppistandi. Kassagítar kannski, ég veit það ekki, þetta verður óvissuferð," segir hann.

Og þegar Leifur hefur sigrað hæsta tind landsins ætlar hann að betrumbæta sleðann.

„Setja jafnvel hjól undir hann og hjóla yfir Kjöl. Hvað var ekki einhver að fara sjö sinnum upp og niður Esjuna á einum degi? Ég get alveg séð það fyrir mér."