Veiðigjaldið samþykkt og Alþingi komið í sumarfrí

Alþingi samþykkti í gærkvöldi hækkun veiðigjalds, með 27 atkvæðum gegn 16. Þrír þingmenn sátu hjá.

Jóhanna Sigurðardóttir forsætisráðherra frestaði svo fundum Alþingis til ellefta september, en fjölmörgum málum, sem til stóð að afgreiða í vor, var frestað til haustsins.

Ásta Ragnheiður Jóhannesdóttir forseti Alþingis sagði að það væri umhugsunarefni hvernig þingstörf væru að þróast og væri það verkefni allra sem starfa á Alþingi að koma þeim í betra horf.

Í sameiginlegri yfirlýsingu formanna ríkisstjórnarflokkanna segir að frestun margra þignmála vegna málþófs stjórnarandstöðunnar sé umhugsunarefni frá sjónarhóli grundvallar leikreglna lýðræðis og þingræðis.