Reykjavík síðdegis á Esjunni

Þeir félagarnir í Reykjavík síðdegis á Bylgjunni munu standa skör hærra í þættinum í dag en venjulega því þeir ætla að senda þáttinn út ofan af Esjunni.

„Við ætlum aðeins að beina augum að Esjunni. Þetta er nú fjall Reykvíkinga," segir Kristófer Helgason dagskrárgerðarmaður. Hann segir að ýmissa grasa muni kenna í þættinum. „Við buðum öllum forsetaframbjóðendum, ef þeir ættu leið framhjá, að detta við hjá okkur," segir Kristófer. Mesta spennan verði að sjá hverjir líta við. „Mér finnst það nú eiginlega mesta spennan í dag, það er hvort og þá hvaða forsetaframbjóðendur mæta," segir Kristófer.

Reykjavík síðdegis hefst strax að loknum fréttum klukkan fjögur.