Stendur öðrum að baki en tækifæri bíða

Þrátt fyrir að Reykjavík standi öðrum höfuðborgum á Norðurlöndum að baki á flestum sviðum sem hafa áhrif á samkeppnishæfni borga eru fjölmörg tækifæri fyrir hendi.

Þetta segir í nýrri alþjóðlegri úttekt ráðgjafafyrirtækisins PwC sem kom út í gær, en þar var samkeppnishæfni borganna á hinum ýmsum sviðum borin saman og sett í alþjóðlegt samhengi.

Í skýrslunni, sem ber yfirskriftina Northern Lights – The Nordic Cities of Opportunity, segir að þó að borgirnar eigi í innbyrðis samkeppni um að laða að sér fjárfestingar, fyrirtæki og ferðamenn, sé engu að síður mikilvægt að þær efli samvinnu sín á milli til að standa betur að vígi á alþjóðlegum vettvangi.

Norræna leiðinNiðurstaða PwC er sú að þrátt fyrir að enn sé langt í land með að ná risaborgum heimsins í samkeppnishæfni séu norrænu borgirnar á réttri leið. Allar búi þær að svipaðri grunngerð með miklum lífsgæðum þar sem rík áhersla sé lögð á markaðshagkerfi með félagslegum áherslum.

Lykillinn að bættri samkeppnishæfni sé að bæta viðskiptaumhverfi með því að liðka fyrir stofnun nýrra fyrirtækja, bæta vinnulöggjöf og ekki síst endurskoða skattastefnu.

Litla systirReykjavík er í síðasta sæti allra þessara systraborga í heildarúttektinni, en engu að síður leiða gögn PwC, sem var aflað í fyrra í söfnum viðurkenndra alþjóðastofnana, það í ljós að margt gefur tilefni til bjartsýni þegar horft er fram á veginn.

Hagvöxtur í Reykjavík árið 2011 var 2,1 prósent, sem er meira en var í Ósló og Kaupmannahöfn, og auk þess voru Reykvíkingar í öðru sæti í þremur flokkum á sviði nýsköpunar og menntunar; stærð kennslubekkja, framboði á stærðfræði- og vísindakennslu og hlutfalli íbúa með háskólamenntun.

Á tæknisviði voru Reykvíkingar svo í fyrsta sæti hvað varðar netaðgang í skólum og á sviði heilbrigðis- og öryggismála er Reykjavík í öðru sæti í heildina, þökk sé sterkri stöðu heilbrigðismála þar sem Reykjavík er í öðru sæti, og þá er þar enn lægsta glæpatíðnin.

Loks er Reykjavík í öðru sæti í skattheimtu, rétt á eftir Kaupmannahöfn sem vermir efsta sætið, og einnig í öðru sæti yfir hversu auðvelt er að stofna fyrirtæki.

Þá er sérstaklega tekið fram að eftirtektarverð klasamyndun á sviðum orkunýtingar og umhverfisferðamennsku hafi átt sér stað í Reykjavík að undanförnu.

EndurreisninSkýrslan segir að gögnin sýni svo ekki verði um villst að sterkir innviðir íslensks samfélags séu lykillinn að endurreisn.

„Það mun ekki gerast tafarlaust,“ segir þar, „en ef til vill skjótar en flestir þorðu að vona fyrir nokkrum árum síðan.“

Í skýrslunni er meðal annars haft eftir Staffan Iversson, einum æðsta embættismanni Stokkhólms, að merkilegt sé „hversu fljótt og ákveðið“ Reykvíkingar hafi brugðist við þeim áskorunum sem blöstu við í kjölfar áfallanna.

thorgils@frettabladid.is