Hægt að klára öll prófmálin á þremur mánuðum

Ef allir leggjast á eitt, verður hugsanlega hægt að klára og dæma í öllum prófmálunum vegna gengislánanna í Héraðsdómi á tveimur til þremur mánuðum, segir staðgengill varadómstjóra í Héraðsdómi Reykjavíkur.

Eins og fram hefur komið náðist aðeins að þingfesta tvö prófmál vegna gengislána - af ellefu áður en Héraðsdómur Reykjavíkur fór í sumarfrí. En vonast er til að þessu ellefu prófmál dugi til að eyða allri óvissu um hvernig beri að reikna skuldastöðu þeirra sem tóku gengislán á sínum tíma.

Umboðsmaður skuldara var bjartsýnn í vor og taldi þá að hægt væri að ljúka málunum í haust, í gær kvaðst hún í samtali við fréttastofu enn vera bjartsýn enda væru allir meðvitaðir um að ljúka þyrfti þessum málum sem allra fyrst.

Fréttastofa náði sambandi við Sigríði Ólafsdóttur, staðgengil varadómstjóra Héraðsdóms Reykjavíkur, í morgun en dómstóllinn hefur samþykkt flýtimeðferð á öll prófmálin. Hún sagði vissulega að ýmislegt gæti haft áhrif á hversu hratt tækist að afgreiða málin fyrir dómstólnum, hins vegar sagði hún að ef allir legðust á eitt þá væri fræðilegur möguleiki að vinna málin og dæma í þeim á tveimur til þremur mánuðum.

Gangi það eftir verður komin niðurstaða í þessi mál fyrir áramót en þá eiga prófmálin væntanlega eftir að fara fyrir Hæstarétt. Prófmálin tvö sem eru komin inn í dómskerfið beinast annars vegar að Lýsingu og hins vegar Arion banka.

Þeim er meðal annars ætlað að svara því álitaefni frá hvaða tíma fólk á að greiða seðlabankavexti, hvort það er til dæmis frá því að lánin voru dæmd ólögleg í júní 2010 eða þegar Árna Páls lögin voru sett í desember sama ár.