Sætanýtingin verri þó farþegum fjölgi

Þrátt fyrir að farþegum milli Keflavíkur og Kaupmannahafnar hafi í ár fjölgað um rúmlega 2400 hefur sætanýtingin í flugum verið verri en í fyrra. Það skýrist af umtalsvert fleiri flugferðum milli staðanna og munar þar mest um tilkomu WOW air.

Í ár hafa 219.849 manns flogið milli Keflavíkur og Kaupmannahafnar. Það er aukning upp á rúmt eitt prósent frá árinu á undan. Hins vegar fjölgaði ferðum meira á sama tíma.

Ef einblínt er á júní mánuð jókst farþegafjöldinn um 3,5% milli ára. Hins vegar voru ferðirnar 9% fleiri í ár, einkum vegna tilkomu WOW air. Sætanýtingin var því verri í ár. Frá þessu er greint á vef turista.is.