Stundum er eins og tilgangurinn sé að skemma sem allra mest

Miklar skemmdir voru unnar á tveimur bifreiðum í Heiðmörk við Furulund í gærkvöld. Eigendur þeirra höfðu brugðið sér í hjólreiðatúr og skilið bílana eftir á meðan. Ófögur sjón mætti þeim þegar þeir komu til baka. Flestar rúður höfðu verið brotnar og greipar látnar sópa um bílana, m.a. hvarf fartölva úr öðrum þeirra.

Samkvæmt upplýsingum lögreglu hafa svona tilvik reglulega komið upp í sumar. Skemmdir hafa verið unnar á bílum við útivistarsvæði og jafnvel líka við fjölfarnar umferðargötur. Stundum er eins og tilgangur hinna óprúttnu aðila sé að skemma sem allra mest.

Lögregla minnir á að verðmæti séu ekki skilin eftir í bílum á víðavangi eða þau alla vega falin og ekki í augsýn.

Þeir sem geta gefið upplýsingar um skemmdarverkin í gær eru vinsamlegast beðnir um að hafa samband við lögregluna í síma 444-1000 en einnig má senda upplýsingar í tölvupósti á netfangið abending@lrh.is