Gengi krónunnar mun ekki falla að mati Seðlabankans

Seðlabankastjóri óttast ekki að gengi krónunnar muni hrynja þegar líða fer á haustið. Aðalhagfræðingur Seðlabankans segir allar greiningar benda til þess að gengið sé of lágt skráð.

Peningastefnunefnd Seðlabankans ákvað í dag að halda vöxtum óbreyttum og var það í takt við spár flestra greiningaraðila. Meðal ástæðna sem nefndin taldi til í rökstuðningi sínum er að verðbólguhorfur hafi batnað frá síðasta fundi nefndarinnar og horfur séu á meiri hagvexti en spáð var í maí.

„Það er meiri hagvöxtur á þessu ári einkum vegna þess að útflutningur hefur verið sterkari en síðan eru næstu tvö ár svipuð, en við endum þó með landsframleiðsluna aðeins hærri. Hvað varðar verðbólguna er það mjög einfalt, gengi krónunnar hefur styrkst verulega, um 8 prósent síðan í maí.," segir Már Guðmundsson, seðlabankastjóri.

Már segir að ekki sé hægt að fullyrða að krónan sveiflist árstíðarbundið þó að gengi hennar hafi lækkað síðastliðin tvö ár yfir vetrartímann, það fari meðal annars eftir þörf fyrirtækja til að greiða niður erlend lán hratt með því að kaupa mikið magn af gjaldeyri og þar með lækka gengi krónunnar.

„Það er óvissa en fólk á ekki að ganga út frá því, það er ekki skrifað í steininn," segir Már.

Aðalhagfræðingur seðlabankans segir greiningar bæði Alþjóðagjaldeyrissjóðsins og Seðlabankans benda til þess að jafnvægisgengi krónunnar sé hærra en það er í dag.

„Þær benda allar til þess að til lengri tíma sé gengi krónunnar of lágt skráð, mismikið eftir því hvaða stúdía það sé, en þær benda allar til þess að efnahagslegir grunnþættir styðji við sterkara gengi krónunnar en hún er núna," segir Þórarinn G. Pétursson, aðalhagfræðingur Seðlabanka Íslands.