Gera heimildarmynd um Guðmund Felix

Danska ríkissjónvarpið og RÚV hafa keypt sýningarrétt á íslenskri heimildarmynd um Guðmund Felix Grétarsson, sem er á leiðinni til Frakklands í handaágræðslu. Fleiri erlendir aðilar hafa sýnt verkefninu áhuga. Tökur á myndinni eru þegar hafnar en hún mun fjalla um líf Guðmundar fyrir og eftir aðgerðina en hann missti báða handleggi í vinnuslysi fyrir tæpum tveimur áratugum.

„Hann átti upprunarlega að fara núna í vor en það er búið að fresta því fram á haust. Hann fer ekki fyrr en í fyrsta lagi í uppskurðinn í október býst ég við," segir Guðbergur Davíðsson kvikmyndagerðamaður, einn af þeim sem vinnur að myndinni. Leyfi hefur fengist til að mynda aðgerðina sjálfa en Guðbergur áætlar að tökur standi yfir í um tvö ár. Verkefnið hefur hlotið vinnutitilinn „Nýjar hendur" og fjármögnunin felst í því að selja sjónvarpsréttinn fyrirfram og hefur danska ríkissjónvarpið þegar tryggt sér réttinn.

„Við erum búin að selja hana til Danmerkur og erum í viðræðum núna við franskan meðaðila sem er kominn langt áleiðis með samninga í Frakklandi. Og síðan erum við með dreifingaraðila líka, alþjóðlegan, sem að koma okkur i´samband við mjög marga aðila. Þetta tekur allt langan tíma svona sölur en þetta er allt í gangi núna. Og RÚV hefur ennig tryggt sér réttinn? Já, RÚV hefur tryggt sér réttinn," segir hann. Búist er við að myndin fari einnig í kvikmyndahús en frumsýning er áætluð haustið 2014.

„Þetta er mannleg saga, baráttusaga, kraftaverkasaga Guðmundar sem samblandast þá einhverjum vísindum. En þetta er aðallega kraftaverkasaga Guðmundar, hvernig hann berst fyrir því að fá nýjar hendur og hvernig honum tekst að aðlagast þeim ef og þegar það gerist," segir Guðbergur Davíðsson kvikmyndagerðamaður.