Fjórbrotinn í andliti eftir árás við Bar 11

"Þetta hefði getað farið miklu verr," segir Arnar Þór Ingólfsson háskólanemi sem varð fyrir fólskulegri árás á Hverfisgötu aðfaranótt laugardags. Hann var sleginn í höfuðið af óþekktum árásarmanni.

Arnar er fjórbrotinn í andliti eftir árásina og ekki er víst hvort hann fái aftur tilfinningu í hluta andlitsins.

Hann var að skemmta sér með vinum sínum á Ellefunni við Hverfisgötu. "Ég man mjög vel eftir mér með vinum mínum inni á staðnum en eftir að ég fór út man ég lítið," segir Arnar. "Ég man óljóst eftir því að hafa legið á jörðinni og staðið á fætur. Svo fór ég bara í leigubíl og heim."

Það var ekki fyrr en daginn eftir að Arnar áttaði sig á því að eitthvað alvarlegra væri að. Hann fór og hitti vini sína morguninn eftir árásina, "svo áttaði ég mig á því að það var eitthvað aðeins meira að þegar ég gat ekki opnað munninn til að borða."

Arnar hafði ætlað að keyra til Þorlákshafnar þar sem hann ætlaði að mæta í vinnu á laugardagskvöld, en fjölskyldan hans býr þar. Frænka hans stöðvaði hann þó. "Henni leist ekki á að ég færi að keyra yfir heiðina enda sá ég ekkert með hægra auganu. Hún fór með mig á Slysó."

Í ljós kom að Arnar er fjórbrotinn í andliti. Hann þurfti að fara í aðgerð og var tveimur plötum komið fyrir. Ekki er víst að hann fái tilfinninguna aftur í þennan hluta andlitsins.

Arnar er nú kominn heim af spítalanum og segist hafa það ágætt, en geri ekkert annað en að liggja fyrir. "Ég sé nokkuð rétt með auganu, það er heppni að ég geri það."

Lögregla ræddi við Arnar í gær vegna málsins en í ljós hefur komið að engar eftirlitsmyndavélar eru á svæðinu þar sem árásin átti sér stað. "Það er mjög leiðinlegt að það séu ekki myndavélar þarna og í bænum almennt. Það er alltaf að koma eitthvað svona upp á og það er betra að hafa myndavélar úti um allt, eins og tíðkast víða í nágrannalöndunum."

Lögreglan á höfuðborgarsvæðinu biður vitni að árásinni um að hafa samband í síma 444-1000 eða á netfangið abending@lrh.is.