Greiddi 950 milljónir fyrir Perluna og vill náttúruminjasafn og kaffihús

Borgarstjórn samþykkti í gær að kaupa Perluna af Orkuveitunni, en borgin greiðir 950 milljónir króna fyrir með handbæru fé og því ekki ráðist í lántökur. Vonir standa til að náttúruminjasafn og kaffihús verði á fyrstu hæðinni og þá er stefnt að því að tryggja áfram rekstur veitingastaðar á efstu hæð.

Dagur B. Eggertsson, formaður borgarráðs, segir að sú leið að selja fyrirtækið til fjárfesta hafi ekki reynst fær þar sem öll tilboð hafi gert ráð fyrir að byggja hótel eða ráðast í frekari uppbyggingu í Öskjuhlíðinni. „Það er ekki það sem var til sölu þannig að þegar þessi hugmynd kom upp að opna þarna náttúruminjasafn þá var kominn nýr flötur á málinu sem við höfum verið að skoða síðan í sumar," segir Dagur.

Hann segir að búið sé að gera frumkönnun að hugmyndun um um náttúruminjasafn og borgin sé nú í viðræðum við menntamálaráðuneytið um að framleigja hluta Perlunnar til að setja upp metnaðarfulla náttúruminjasýningu. „Við gerum ráð fyrir að næsta ár fari í uppsetningu hennar þannig að sýningin geti opnað snemma árs 2014."

Verðið sem Reykjavíkurborg greiðir Orkuveitunni fyrir Perluna er 950 milljónir króna. Í samræmi við nýja eigendastefnu OR einbeitir fyrirtækið sér nú að kjarnastarfsemi sem þjónustufyrirtæki á höfuðborgarsvæðinu.

En er Reykjavíkurborg alveg aflögufær með þessa peninga? „Við þurfum ekki að taka lán fyrir þessu því við eigum þetta í handbæru fé. Það skiptir hins vegar máli að við munum gera leigusamninga um stóran hluta hússins. Orkuveitan hefur auðvitað tapað á hverju ári og borgað með Perlunni í mörg ár. Við vonumst til þess að geta rétt aðeins úr kútnum hvað það varðar. Orkuveitan er a.m.k ekki fær um að eiga eignir sem þarf að borga með," segir Dagur. Hann segir að borgin sjái fyrir sér að peningarnir verði endurheimtir með leigutekjum að hluta á löngum tíma.

„Við bindum vonir við að þetta hús, með metnaðarfullri náttúruminjasýningu, geti orðið innspýting, bæði fyrir ferðaþjónustuna og ekki síst að þetta verði spennandi viðkomustaður fyrir fjölskyldur og börn," segir Dagur. Lengi hafi vantað safn af þessu tagi.

Ekki stór ísbúð

Nýlega var samningum um veitingaþjónustu í Perlunni sagt upp, en Dagur segir að þeir verði boðnir út að nýju og vonir standi til að veitingarekstur verði áfram tryggður í húsinu. „Perlan er í dag einn fjölsóttasti ferðamannastaður borgarinnar. Við teljum að hægt sé að byggja á þeirri velgengni og það verði áfram metnaðarfullur veitingarekstur. Hugsanlega bætist við kaffihús á jarðhæðinni í tengslum við safnið, en við sjáum ekki fyrir okkur að þetta verði ein stór ísbúð, heldur að það bætist þarna í flóruna." thorbjorn@stod2.is