Enn leynd yfir skyndilegri brottvikningu bæjarstjóra

Enn ríkir þögn um það hversvegna bæjarstjóranum á Akranesi var skyndilega vikið frá störfum um helgina. Samkvæmt heimildum fréttastofu snýst málið um dagpeninga og aksturskostnað bæjarstjórans.

Ekkert hefur verið gefið upp um ástæður þess að starfandi bæjarstjóra á Akranesi var skyndilega vikið frá störfum tímabundið á sunnudaginn. Jón Pálmi Pálsson, sem verið hefur bæjarritari til fjölda ára var settur bæjarstjóri þegar Árni Múli Jónasson lét af störfum í byrjun nóvember. Á mánudag barst síðan tilkynning frá bæjarstjórn á þá leið að grunur léki á að bæjarstjórinn hafi gerst brotlegur við starfsskyldur sínar. Engar frekari skýringar hafa hinsvegar verið gefnar.

Eftir því sem fréttastofa kemst næst snýst málið um það hvernig Jón Pálmi hafi innheimt dagpeninga- og aksturskostnað. Hann hafi sótt fundi sem fulltrúi sveitarfélagsins en um leið haft seturétt á þessum sömu fundum í krafti setu sinnar í ráðum og nefndum á Vesturlandi og á hann einnig að hafa innheimt kostnað fyrir þau störf og því á stundum fengið tvöfaldar- eða jafnvel þrefaldar greiðslur. Samkvæmt heimildum fréttastofu leikur vafi á lögmæti þessa og því var gripið til þess ráðs að rannsaka málið.

Sveinn Kristinsson forseti bæjarstjórnar neitar því staðfastlega að málið snúist um dagpeninga, en vill að öðru leyti enn sem fyrr ekkert tjá sig um málið. Hann segir þó að endurskoðanda og lögmanni bæjarins hafi verið falið að ljúka rannsókn sinni í þessari viku og býst hann við niðurstöðu úr henni á föstudaginn kemur. Í framhaldi af því verði frekari ákvarðanir teknar. Jón Pálmi vildi heldur ekkert tjá sig um málið þegar eftir því var leitað í dag.