Líffræðingur segir arnarmyndband líklega fölsun - Gullörn sjaldséður í Montreal

Kristinn Haukur Skarphéðinsson, líffræðingur hjá Náttúrufræðistofnun, og helsti sérfræðingur landsins um erni, segir í samtali við Reykjavík síðdegis á Bylgjunni í dag, að það sé margt athugavert við myndband sem hefur farið víða á netinu í dag og telur það í besta falli sviðsett, enda nær ómögulegt, að hans mati, að örn geti lyft tveggja ára barni með þessum hætti.

Það hefur líklega ekki farið framhjá mörgum myndbandið sem sýnir heljarinnar Gullörn steypa sér til jarðar og gera tilraun til þess að hefja tveggja ára gamalt barn á loft - án árangurs þó. Örninn missir barnið og flýgur á brott. Ekkert virðist ama að barninu á eftir. Líkt og fjölmargir á netinu þá efast Kristinn um sannleiksgildi myndbandsins sem á að vera tekið í Montreal.

„Í fyrsta lagi eru Gullernir mjög sjaldgæfir í Montreal, þar sem myndbandið á að hafa verið tekið," segir Kristinn. Hann bætir við að það sé tæknilega séð hægt að þjálfa Gullörn til þess að gera þetta, en er þó efins þó hann útiloki ekki að myndbandið sé sviðsett.

Vísir birti einnig myndband þar sem sérfræðingar sýndu ferlið hægt þegar örninn á að nema barnið á brott. Þar má meðal annars sjá að eftir að örninn sleppir takinu er eins og barnið farið örlítið upp áður en það fellur niður á jörðina á ný. Það má sjá í viðhengi hér fyrir neðan.

Þá er hægt að hlusta á viðtali við Kristinn hér fyrir ofan, en þar er meðal annars rædd athyglisverð frétt Morgunblaðsins þar sem kona lýsir því þegar hún var numinn á brott af haferni fyrir þar síðustu aldamót.