Erlendir sælkerar vilja íslenska lambið

„Við erum að horfa á útflutning til dýrari markaða í Evrópu og Asíu. Svo á íslenska lambakjötið að sjálfsögðu heima í Kanada og við erum að skoða þann möguleika mikið,“ segir Helgi Einarsson, framkvæmdastjóri Íslenskra matvara og ritari Alheimssamtaka matreiðslumanna (WAX).

Helgi segir samtökin farin að starfa með öllum helstu matreiðsluskólum í heiminum og ef íslenskir framleiðendur vilji nálgast erlenda markaði, sé tækifærið núna. Fyrirspurnir vegna íslensks lambakjöts berist reglulega, meðal annars frá Singapúr, Frakklandi, Sádi-Arabíu og Sviss.

„Erlendir markaðir eru svo stórir og því þarf að einbeita sér að minni og dýrari sælkeramörkuðum,“ segir Helgi.

Íslenskar matvörur ehf. er fyrsta fyrirtækið til að flytja inn erlent lambakjöt til landsins, en sending af nýsjálensku lambakjöti er komin til landsins, að því er fram kom í Bændablaðinu í gær. Helgi segir innflutninginn bæði vera til að bregðast við þeim kjötskorti sem orðið hefur hér undanfarin ár, en einnig til að skoða markaðinn.

„Við ætlum að byrja með dýrari vöðva. Ég finn fyrir áhuga víða á markaðnum á innfluttu kjöti, en það verður að hafa í huga að lambakjötið okkar er þjóðarstoltið, svo það er svolítið öðruvísi farið með það,“ segir hann. „En þjóðernisvitundin gerir það að verkum að þegar erlent kjöt er á markaðnum ýtir það undir bæði gæði og verð á innlendu hráefni og það er jákvætt.“

Magnús Freyr Jónsson, framkvæmdastjóri Sláturhúss KVH á Hvammstanga, tekur undir orð Helga og segir fyrirspurnir tíðar um betra íslenskt lambakjöt erlendis frá. Mest sé þó verið að flytja út aukaafurðir sem ekki er hægt að koma í verð hérlendis.

„Það koma fyrirspurnir og hafa gert lengi, það vantar alltaf alls staðar sömu bitana,“ segir hann. „Við erum ítrekað beðnir um þá. En staðan á evrópskum mörkuðum er slæm, svo útflutningur er erfiður.“

Sláturhús KVH hefur flutt gæðakjöt til sælkerakeðjunnar Whole Foods í Bandaríkjunum og eftir helgi fer fyrsta sendingin til Kanada. „Þar er varan seld sem íslenskt gæðakjöt,“ segir Helgi. „Við gætum flutt miklu meira til Ameríku, það er endalaus eftirspurn. En okkar aðalmarkaður er samt sem áður sá íslenski. Hann er enn þá verðmætastur.“

sunna@frettabladid.is