Segist hafa fallið út úr Gamla bíói og brotið sköflunginn

„Þetta var frekar óskemmtilegt," lýsir Margrét Hildur Guðmundsdóttir í þættinum Í bítið á Bylgjunni í morgun en hún segist hafa fallið niður á götu á tónleikum Jet Black Joe í Gamla bíó aðfaranótt laugardags, þegar hún ætlaði ásamt vinkonum sínum út að fá sér ferskt loft. Margrét Hildur segist hafa verið baksviðs ásamt öðru fólki þegar þær vinkonurnar ætluðu út.

Þær sáu eldvarnarhurð sem Margrét Hildur opnaði. Hún segist hinsvegar ekki hafa horft fram fyrir sig þegar hún opnaði hurðina. Hún steig því út fyrir og þá mætti henni ekkert nema fallið. Hún féll niður hátt í tvo metra og hafnaði á steyptu bílastæði fyrir neðan.

„Þegar ég lenti velti ég því bara fyrir mér hvort ég væri hálsbrotin eða yfir höfuð enn á lífi," lýsir Margrét Hildur í viðtali við Bítið en hún var ringluð eftir fallið. Hún fann mikið til í líkamanum að eigin sögn en í stað þess að hringja í sjúkrabíl hringdi hún í leigubíl.

„Mér fannst þetta eitthvað svo hallærislegt að ég vildi ekki vera að draga athyglina að mér," sagði Margrét Hildur sem sagði að sú undarlega hugsun hefði sótt að henni að enginn mætti sjá hversu klaufalegt þetta hefði verið hjá henni. Vinkonur hennar hjálpuðu henni og kölluðu á leigubíl. Margrét Hildur vonaðist til þess að geta sofið þetta af sér, en annað kom í ljós.

Daginn eftir fór hún upp á spítala. Þar kom í ljós að hún hafði brotið á sér sköflunginn. Hún þarf því að vera í gifsi næstu 6 vikurnar, en ætti að ná sér að fullu eftir þrjá til fjóra mánuði ef allt gengur eftir.

Enginn veit neitt

Signý Eiríksdóttir, verkefnastjóri Leikhúsmógulsins, sem rekur húsið, segir í samtali við Vísi að lögreglan hafi komið á vettvang og tekið út aðstæður vegna málsins. Hún segist þó ekki kannast við neitt, „það veit enginn neitt um þetta mál, mér finnst þetta mjög undarlegt."

Signý segir að gestir eigi ekki að vera þar sem hljómsveitin var þetta kvöld og hún heldur því fram að enginn kannist við að Margrét Hildur hafi verið á svæðinu. „Mér finnst þetta mjög undarlegt. Það kannast enginn við þetta, það var enginn sem bauð henni þangað, hljómsveitin bauð henni ekki einu sinni," segir Signý sem áttaði sig illa á málin og fékk litlar upplýsingar frá lögreglunni.



Hún áréttar þó að þeim þyki málið afar leitt.

Vinnueftirlitið rannsakar málið

Umsjónarmaður Reykjavíkurumdæmis Vinnueftirlitsins, Steinar Harðarson, segir Vinnueftirlitið vera með málið á sínu borði. Fulltrúar Vinnueftirlitsins áttu þó eftir að fara á vettvang og taka út aðstæður, búist var við að það yrði gert í dag. „En það er alveg ljóst að það sé forkastanlegt ef að hurð, sem ekkert er að baki nema fall, sé ólæst," segir Steinar og talar þá almennt um aðbúnað í kringum eldvarnarhurðir.

Hægt er að lesa viðtalið við Margréti Hildi hér fyrir ofan.