Útveguðu mjólkurpela og drykki - farþegar halda áfram síðdegis

Um tuttugu fjöldahjálparstjórar og sjálfboðaliðar Rauða krossins á Suðurnesjum og höfuðborgarsvæðinu hafa síðustu klukkustundirnar hlúð að 238 farþegum og 17 manna áhöfn flugvélar frá Aeroflot í flugskýli á öryggissvæði á Keflavíkurflugvelli samkvæmt tilkynningu frá Rauða krossinum.

Rauði krossinn dreifði teppum til fólksins og mat, vatni, te, kaffi og ávöxtum auk þess sem barnafjölskyldum voru útvegaðir mjólkurpelar og aðrar nauðsynjar. Farþegarnir voru allir án handfarangurs þangað til nú um þrjúleytið og því gengu sjálfboðaliðar á milli fólks, könnuðu ástand þess og útveguðu fólki nauðsynleg lyf sem það gat ekki verið án.

Túlkar úr hópi sjálfboðaliða Rauða krossins hafa aðstoðað við samskipti og upplýsingagjöf auk þess sem túlkur frá Rússneska sendiráðinu er á staðnum og fulltrúar frá Bandaríska sendiráðinu.

Flugvélin lenti á Keflavíkurflugvelli í morgun vegna sprengjuhótunar. Rauði krossinn opnaði fjöldahjálparstöð í Öldutúnsskóla í Hafnarfirði í morgun þar sem til stóð að taka á móti fólkinu áður en því yrði útveguð gisting á Íslandi. Horfið var frá því eftir að Aeroflot ákvað að senda aðra flugvél eftir fólkinu og var fjöldahjálparstöðinni þar lokað um hádegisbil.

Guðmundur Þórir Ingólfsson, verkefnisstjóri neyðarvarna Rauða krossins á Suðurnesjum, sagði nú upp úr þrjú að fólkið væri búið að fá handfarangur sinn og væri byrjað að týnast upp í rútur sem flytja það aftur í flugstöð Leifs Eiríkssonar.

Áætlað er að önnur flugvél Aeroflot komi til Keflavíkur upp úr fimm síðdegis og er brottför áætluð rúmlega sex. Guðmundur lofaði sérstaklega gott samstarf allra sem komu að aðstoð við farþegana, starfsfólk Isavia, Flugleiða og sjálfboðaliða Rauða krossins.