Gróðrarskúr loksins í Reykjavík

Hlé varð á samfelldum níu daga þurrviðriskafla í Reykjavík í dag þegar regndropar tóku að falla laust fyrir klukkan fjögur en síðast rigndi að ráði í borginni fyrr hálfum mánuði. Úrkoman í Reykjavík mældist 0,5 millimetrar á síðustu klukkustund á mælum Veðurstofu.

Mesta úrkoma á landinu í dag hefur mælst á Kvískerjum í Öræfum, 11,4 millimetrar, og á Kirkjubæjarklaustri, 4,7 millimetrar.

Fara þarf aftur til 29. maí til að finna dæmi um úrkomuvott en þann dag var súld í Reykjavík um tíma. Úrkoma mældist einnig þann 26. maí en til að finna dæmi um rigningu þarf að fara tvær vikur aftur í tímann, til 24. maí.

Áhugamenn um ræktun fagna vafalaust þessari gróðrarskúr og áhyggjur af gróðureldum, eins og urðu í Heiðmörk í gær, ættu að vera úr sögunni í bili.