"Hann var alltaf glaður, ótrúlega fyndinn og einstakur"

Átján ára Íslendingur var myrtur í Tulsa í Óklahómafylki í gærmorgun. Bandarískir fjölmiðlar segja að ekkert bendi til þess að morðinginn hafi þekkt piltinn og hann hafi því verið fórnarlamb tilgangslauss fólskuverks. Vinir hans úr Hagaskóla hittust í dag. Þeir segja hann hafa verið einstaklega skemmtilega manneskju.

Pilturinn hét Kristján Hinrik Þórsson, kallaður Hinrik, og hafði verið búsettur stóran hluta ævi sinnar í Bandaríkjunum. Aðfaranótt laugardagsins var hann staddur sem farþegi í bíl 37 ára félaga síns á bílastæði fyrir utan verslun. Bandarískir fjölmiðlar hafa eftir vitnum að þar hafi maður komið aðvífandi haldið því fram að þeir hefðu næstum ekið yfir sig. Við það hafi mennirnir byrjað að deila og skyndilega hafi maðurinn dregið upp skammbyssu og skotið fjölda skota inn í bílinn.

Lögreglan í Tulsa leitar morðingjans og er nú að fara yfir upptökur úr öryggismyndavélum á svæðinu. Bandarískir fjölmiðlar segja að ekki sé talið að mennirnir hafi þekkst.

Í Vesturbænum hittust gamlir skólafélagar úr Hagaskóla til að minnast félaga síns. Flestum þeirra bárust fréttir af andláti Hinriks þegar þeir voru staddir í afmælisboði í gærkvöldi.

„Síðan fékk vinur minn símtal, frá vini okkar sem hafði séð þetta á fréttamiðli úti," segir Ólafur Gunnar Daníelsson, vinur Hinriks. „Við náttúrulega brotnuðum saman. Sátum og bara alveg brjálaðir okkur leið svo illa.Við vorum bara svo ótrúlega reiðir og fannst þetta svo ótrúlega ósanngjarnt."

Svona lýsir Ólafur Gunnar vinur hans honum.

„Hann var alltaf glaður, hann var ótrúlega fyndinn og í raun mjög einstakur. Ég veit að minnsta kosti ekki um neinn eins og hann. Hann var bara alltaf glaður og skemmtilegur og alltaf hress. Við töluðum saman fyrir örfáum dögum og þá var hann að segja að hann vildi koma til Íslands aftur."

Ólafur segir Hinrik hafa verið vinsælan félaga.

„Hann átti svo marga góða vini hérna. Við strákarnir allir úr Vesturbænum við vorum alltaf saman."

Er eitthvað sem þú vilt bæta við? „Bara til fjölskyldu hans. Ég votta þeim samúð mína, þetta er alveg hrikalegt."