Keypti peysu af Dorrit til styrktar fötluðum börnum

Kona sem keypti peysu af Dorrit Moussaeiff forsetafrú á uppboði til styrktar sumarbúðum fatlaðra barna, segir að gott sé að geta styrkt gott málefni á þennan hátt. Ekki skemmir heldur fyrir hversu glæsileg forsetafrúin er.

Uppboðið var haldið í kjölfar þess að góðgerðarsamtökin Kids Parliament veittu Freyju Haraldsdóttur mannúðarverðlaun fyrir baráttu sína fyrir mannréttindum fatlaðra.

Margt var um manninn í Norðuljósasal Hörpunnar en þar voru meðal annars Jakob Frímann stuðmaður, Simmi og Jói á Fabrikunni og Kormákur og Skjöldur sem stjórnuðu uppboðinu af mikilli festu.

Er þetta í fyrsta sinn sem þið gerið svona?

„Já. Ég hef aldrei haldið uppboð áður. Við vorum að rifja upp einhver tilþrif því maður hefur séð svo marga þætti. En þetta er allt öðruvísi," segir Skjöldur.

Alls voru fimmtán hlutir boðnir upp - þar á meðal kvöldverður með stjörnukokknum Hrefnu Sætran, VIP-miðar á leik Manchester United og Glatasaray í meistaradeild Evrópu og árituð knattspyrnutreyja af spænska fótboltalandsliðinu, sem fór á 180 þúsund krónur. En rúsínan í pylsuendanum voru tvær peysur í eigu forsetafrúarinnar sem fóru báðar á þrjátíu þúsund krónur.

Sigrún Bárðardóttir keypti aðra peysuna.

„Einstaklega gaman að styrkja svona göfugt málefni. Gaman að koma hérna og fá tækifæri til þess að taka þátt í því. Dorrit er bara svo frábær og hefur gert svo mikið fyrir Ísland. Svo er hún líka einstaklega flott kona. Við getum ekki neitað því," segir Sigrún.

Ertu búin að ákveða hvenær þú ætlar að fara í peysuna góðu?

„Ég held það verði bara við fyrsta tækifæri. Þetta er alveg gullfalleg peysa," segir hún.