Skipverjarnir hafa það gott

„Þeir hafa það bara gott. Það er gott veður á svæðinu og skipstjórinn telur að skipið liggi í sandfjöru þannig það er enginn sjáanlegur olíuleki. Aðstæður eru eins góðar og á verður kosið," segir Ólafur William Hand, upplýsingafulltrúi Eimskips.

Skip félagsins Polfoss strandaði við eyjuna Altra í norðurhluta Noregs klukkan sex í morgun. Engin slys urðu á áhöfninni, sem er norsk og frá austur-Evrópu. „Þetta er skip sem er við strandsiglingar við Noregsstrendur," segir Ólafur.

„Menn eru núna bara að bíða eftir því að það flæði undir skipið en það á að gerast klukkan 13:45 að staðartíma. Þá kemur í ljós hvort að hægt sé að losa það," segir hann.

Skipið var að flytja 1800 tonn af frystum fiski þegar það sigldi á fullri ferð, eða á 13 hnúta hraða (24 km/klst).