Formaður Rósarinnar segist hafa verið blekktur

„Við vorum blekkt," segir Birgir Dýrfjörð, formaður landsmálafélagsins Rósarinnar, sem er aðildarfélag að Samfylkingunni, en úrskurðarnefnd flokksins úrskurðaði að 350 nýir meðlimir Rósarinnar fá ekki að kjósa í prófkjöri flokksins í Reykjavík sem haldið verður nú um helgina. Prófkjörið hófst á miðnætti og stendur fram á laugardag.

Birgir Dýrfjörð segir að hann hafi staðið í þeirri trú að nýskráðir félagar í Rósinni mættu taka þátt í prófkjöri flokksins, eftir að hann fékk fullvissu um það af hálfu kjörstjórnar, að eigin sögn.

„Svo klukkan hálf-tíu í gærkvöldi fékk ég póst þar sem heimtað var staðfestingar," segir Birgir og bætir við að hann hafi fengið nokkrar klukkustundir til þess að senda þessar staðfestingar, sem hann sendi ekki. Var því tekin sú ákvörðun að fjarlægja þessa nýju 350 einstaklinga af kjörskrá flokksins í prófkjörinu, en meðlimir Rósarinnar geta aftur á móti kært þessa ákvörðun samhliða því sem þeir kjósa í prófkjörinu.

„Þetta er samsæri á lúalegasta máta sem um getur, okkur voru gefnir fimm virkir tímar til þess að klára þetta," segir Birgir ósáttur. Samkvæmt heimildum Vísis voru það frambjóðendurnir Skúli Helgason og Sigríður Ingibjörg Ingadóttir sem kærðu skráningu Rósarinnar.

Úrskurður nefndarinnar er endanlegur. Aðspurður hvað sé til ráða, svarar Birgir því til að hann sé ekki búinn að skoða alla möguleika, „en það er til að mynda hægt að krefjast lögbanns á kosningarnar," segir hann án þess þó að slíkt sé í burðaliðunum.

Formaður kjörstjórnar, Stefán Benediktsson, segir í samtali við Vísi að farið hafi verið fram á staðfestingar á nýskráningum innan ákveðins frests, þegar þær bárust ekki var þetta ákvörðunin. Hann áréttar að skráðir meðlimir Rósarinnar geti kært ákvörðunina samhliða því sem þeir kjósa í prófkjörinu.