Vegagerðin varar við snjóflóðahættu í Súðarvíkurhlíð

Vegagerðin varar við snjóflóðahættu í Súðavíkurhlíð og eru vegfarendur beðnir um að vera ekki á ferðinni að óþörfu og sýna aðgát.

Gert er ráð fyrir vaxandi hríð og vindi á Norðurlandi, einkum þó í útsveitum frá Þverárfjalli og austur um í Hófaskarð. Hvasst verður einnig á þessum slóðum og mjög takmarkað skyggni samkvæmt tilkynningu frá Vegagerðinni.

Annars er spáð éljagangi um landið norðvestanvert og eins vestan- og suðvestanlands fram á kvöld. Lágrenningur allvíða, en skyggni yfirleitt þokkalegt.

Hálkublettir og éljagangur er á Höfuðborgarsvæðinu og á Sandskeiði . Hálkublettir eru á Hellisheiði og í Þrengslum. Snjóþekja eða hálka er á öllum leiðum á Suðurlandi.

Hálkublettir og éljagangur er á Reykjanesbraut og hálkublettir á Grindarvíkurvegi og flestum öðrum leiðum á Reykjanesi. Hálka er á Suðurstrandarvegi.

Á Vesturlandi er snjóþekja og skafrenningur á Holtavörðuheiði. Hálka og éljagangur er á norðanverðu Snæfellsnesi. Á öðrum leiðum er hálka eða hálkublettir og éljagangur.

Á Vestfjörðum er hálka og éljagagangur á Steingrímsfjararheiði, hálka og skafrenningur á Þröskuldum og á Klettsháls.

Hálka eða hálkublettir og skafrenningur er í Ísafjarðardjúpi. Hálka eða hálkublettir og skafrenningur er á flestum öðrum leiðum.

Á Norðvesturlandi er hálka og éljagangur á Þverárfjalli og hálka og skafrenningur á Vatnsskarði. Snjóþekja og snjókoma er á Siglufjarðarvegi. Hálka eða hálkublettir og éljagangur er á flestum öðrum leiðum.

Á Norðausturlandi er hálka og éljagangur á Öxnadalsheiði og snjóþekja og éljagangur á Víkurskarði og flestum leiðum austan við Akureyrir. Hálublettir eða hálka og éljagangur er með ströndinni. Hálka er á flestum öðrum leiðum.

Á Austurlandi er hálka á flestum leiðum út frá Egilsstöðum. Hálkublettir eru á Fjarðarheiði, Fagradal og Oddskarði en auður vegur frá Reyðarfirði og með ströndinni. Breiðdalsheiði og Öxi eru ófærar.

Á Suðausturlandi er snjóþekja og éljagangur frá Kvískerjum og að Mýrdalssandi en hálka og éljagangur eftir það og yfir Reynisfjall.