Mikið um líkamsárásir eftir Menningarnótt

Alls voru níu líkamsárásir tilkynntar til lögreglunnar í nótt. Allar árásirnar áttu sér stað í miðborg Reykjavíkur eftir Menningarhátíðina í gærkvöldi. Einn ofbeldismaður var vistaður í fangageymslu eftir líkamsárás á gatnamótum Laugavegs og Klapparstígs.

Fórnarlamb árásarinnar var fluttur meðvitundarlaus á slysadeild með sjúkrabíl. Samkvæmt upplýsingum frá lögreglu var oftast um pústra að ræða á milli ölvaðra einstaklinga og málsatvik óljós.

Töluverður erill var hjá lögreglu þegar leið á nóttina vegna ölvunar. Fjöldi fólks var á götum miðborgarinnar fram undir morgun eftir Menningarnótt.