Braust inn og réðst á húsráðanda

Brotist var inn í hús í Reykjanesbæ í nótt. Karlmaður braut glugga á útihurð og komst þannig inn. Húsráðandi vaknaði við lætin og mætti manninum í anddyrinu. Sá sem braust inn réðst þá á húsráðandann og urðu nokkur átök inn í húsinu. Húsráðandanum tókst svo að stökkva manninum á flótta. Lögreglan hefur ekki fundið manninn og er hans enn leitað. Ekki er vitað hvað honum gekk til með athæfi sínu.

Þá voru þrír karlmenn handteknir i Hafnargötu í Reykjanesbæ eftir að þeir réðust á fjórða manninn. Mennirnir spörkuðu og slógu manninn sem var blóðugur og illa farinn þegar lögreglan kom á vettvang. Mennirnir þrír voru handteknir en þeir gista enn fangageymslur lögreglunnar á Suðurnesjum. Sá sem varð fyrir árásinni er ekki illa slasaður. Hann er bólginn og með skurði en óbrotinn.