Hátt í 80 jarðskjálftar um helgina

Hátt í áttatíu skjálftar hafa mælst síðan á föstudaginn en sá stærsti mældist nærri Goðabungu nærri Mýrdalsjökli en hann var 3,8 á richter samkvæmt upplýsingum frá Veðurstofu Íslands.Töluvert var svo um minni skjálfta á svipuðu svæði en ekkert í líkingu við þann stóra.

Síðdegis í gær var svo skjálftahrina á Krísuvíkursvæðinu. Sá stærsti mældist 2,1 á richter. Nokkuð var um skjálfta fram eftir kvöldi en svo virðist hrinan hafa lognast út af í dag.

Samkvæmt jarðfræðingi hjá Veðurstofu Íslands er ekki um óeðlilega skjálftahrinu að ræða.