Gildistöku byggingareglugerðar frestað

Gildistöku nýrrar byggingareglugerðar hefur verið frestað fram til 15. apríl næstkomandi. Þetta er gert með því að Svandís Svavarsdóttir, umhverfis- og auðlindaráðherra, framlengir til 15. apríl bráðabirgðaákvæði nýju reglugerðarinnar sem kveður á um að byggingafulltrúum sé heimilt að gefa út byggingarleyfi á grundvelli krafna eldri byggingarreglugerðar, að uppfylltum ákveðnum skilyrðum. Samhliða verða gerðar breytingar á ákvæðum nýrrar byggingarreglugerðar er varða einangrun og rýmisstærðir.

Nokkur umfjöllun hefur verið um nýju reglugerðina frá því að hún tók gildi og hefur meðal annars komið fram að með reglugerðinni muni byggingakostnaður hækka verulega. Í tilkynningu frá ráðuneytinu segir að í framhaldi af ábendingum sem þar hafa komið fram verði gerðar nokkrar efnislegar og tæknilegar breytingar á reglugerðinni sem og breytingar er varða nálgun og sveigjanleika í kröfum reglugerðarinnar. Breytingarnar lúta m.a. að ákvæðum er varða einangrun byggingarhluta og rýmisstærðir og eiga að fela í sér aukinn sveigjanleika fyrir hönnuði til að ná markmiðum um algilda hönnun og aðgengi.

Fyrrgreint bráðabirgðaákvæði er framlengt með það að markmiði að gefa frekara ráðrúm til samráðs við hagsmunaaðila sem umhverfis- og auðlindaráðherra hefur falið Mannvirkjastofnun að leiða, sem og að veita frekari tíma fyrir framkvæmdaraðila til að ljúka hönnun verka áður en heimild til að fylgja fyrri byggingarreglugerð fellur að fullu úr gildi.