Jens sagður beita konur ofbeldi með kerfisbundnum hætti

Mál manns, sem grunaður er um að hafa misþyrmt 18 ára stúlku hrottalega fyrir nokkrum dögum, er einstakt að sögn saksóknara hjá lögreglunni. Ekki sé sé vitað um jafn kerfisbundið ofbeldi gegn jafn mörgum konum og birtist í hans málsgögnum.

Samkvæmt sakavottorði hefur Jens Hjartarson hlotið 15 sinnum dóm frá árinu 2002. Þyngsti dómurinn féll árið 2003. Þá hlaut hann 7 ára fangelsi fyrir morðtilraun og ítrekaðar sérlega hættulegar líkamsárásir. Meðal annars skar hann einn mann á háls og stakk annan í kviðinn. Eftir að ákærði var fluttur í fangaklefa beit hann lögregluþjón.

Bara í ár er rökstuddur grunur um að hann hafi gerst sekur um fjölmörg hegningarlagabrot, fjögur ofbeldisbrot, nauðgun, eignaspjöll og brot gegn umferðarlögum og lögum um ávana- og fíkniefni.

Í úrskurði Hæstaréttar kemur fram að það sé mat lögreglu að maðurinn hafi einbeittan brotavilja og að undanförnu hafi ekkert lát verið á brotum hans sem séu ósvífin og tengist oft ofbeldi gegn ungum konum.

En hvers vegna krafðist lögregla ekki gæsluvarðhalds fyrr?

"Þessi mál hafa ekki öll komið til okkar með kærum fyrr en í desember. Við þurfum að eiga traust og trúnað þolandanna sem eiga erfiða göngu fyrir höndum við að reyna að komast út úr þessu ástandi og leita sér hjálpar," segir Jón H. B. Snorrason, aðstoðaryfirlögregluþjónn og saksóknari hjá lögreglunni á höfuðborgarsvæðinu.

Hann segir að mál sem þessi séu mjög erfið í meðförum enda sé þolendur og á tíðum mjög tilfinningalega bundnir gerendunum, vilji ekki kæra og telji sig eiga sök á brotunum auk þess sumir séu auk þess of hræddir við að kæra. Brotaferill þessa manns virðist einstakur af gögnum málsins að dæma. Maður hafi ekki áður verið úrskurðaður í gæsluvarðhald fyrir síendurtekin brot sem falla undir skilgreininguna heimilisofbeldi.

"Þetta mál er sérstakt að því leytinu til, því við höfum sem betur fer fá dæmi um einstakling sem beitir svona kerfisbundnu ofbeldi, að því er virðist á málunum, gagnvart mörgum þolendum. Það er einstakt."

Hann segir að oft sé þó krafist gæsluvarðhalds vegna heimilisofbeldis enda sé oft um alvarlegar líkamsárásir að ræða.

„Ég hugsa að um það bil helmingur manndrápsmála undanfarinn áratug eigi sér undanfara í heimilisofbeldi sem svo endar með manndrápi," segir Jón H. B. Snorrason.

Í úrskurði Hæstaréttar segir meðal annars:

„Með vísan til brotaferils kærða á undanförnum vikum og mánuðum sé það mat lögreglustjóra að yfirgnæfandi líkur séu fyrir því að hann muni halda áfram brotastarfsemi fari hann frjáls ferða sinna og því nauðsynlegt að kærði sæti gæsluvarðhaldi á meðan mál hans sæti rannsókn lögreglu og eftir atvikum dómsmeðferð.“

Þá segir að brot kærða í eðli sínu svo svívirðileg að almannhagsmunir krefjist þess að hann sæti gæsluvarðhaldi. Það myndi valda mikilli hneykslun og særa réttarvitund almennings gengi kærði frjáls ferða sinna. Jens hafi ítrekað orðið uppvís að alvarlegum ofbeldisbrotum og verði að teljast mjög hættulegur umhverfi sínu og því afar brýnt að honum verði gert að sæta gæsluvarðhaldi með tillit til almannahagsmuna.