Enn mikill viðbúnaður í héraðsdómi

Sami viðbúnaður er í Héraðsdómi Reykjaness í dag, á öðrum degi réttarhaldanna yfir Annþóri Karlssyni, Berki Birgissyni og félögum, og var í gær. Annþór og Börkur verða viðstaddir þegar fyrsta vitni í líkamsárásarmáli gefur skýrslu. Þetta er aðalvitni ákæruvaldsins. Þessi árás átti sér stað í Mosfellsbæ. Annþór og Börkur eru ásamt sjö öðrum sakaðir um að hafa ráðist á fjóra menn með golfkylfum, trékylfum og sleggju.

Eins og fram kom á Vísi í gær hefur dómari ákveðið að fréttaflutningur frá málinu verði takmarkaður. Það verður því ekkert sagt efnislega frá skýrslutökunum fyrr en að þeim loknum, en stefnt er á að þeim ljúki í lok dags.

Þeir Annþór og Börkur báru sig illa þegar þeir voru leiddir fyrir dóminn í gær. Börkur kvartaði undan verkjum í baki og Annþór kastaði upp.