Myndir Halldórs Baldurssonar úr héraðsdómi

Teiknarinn Halldór Baldursson fór á vegum Fréttablaðsins í réttarsal og fangaði með blýanti sínum þegar Annþór og Börkur gáfu skýrslu fyrir dómi.

Lögreglan hafði mikinn viðbúnað, þrettán lögregluþjónar voru á staðnum. Sést meðal annars á einni myndinni hvernig lögreglumaður stendur vörð fyrir aftan verjendur.

Fjölskipaður dómurinn féllst á kröfu saksóknarans Karls Inga Vilbergssonar um að fréttaflutningur af því sem kæmi fram í réttarhöldunum yrði bannaður þar til öllum skýrslutökum yrði lokið. Það gæti orðið á morgun, en mun tefjast fram á miðvikudag hið minnsta gangi ekki allt að óskum.

Ákvörðunin byggir á 11. grein sakamálalaga, þar sem segir að "þótt þinghald sé háð í heyranda hljóði getur dómari bannað að skýrt verði frá því sem gerist þar ef ætla má að frásögn geti leitt til sakarspjalla eða valdið vandamönnum sakbornings, brotaþola eða öðrum sem ekki eru fyrir sökum hafðir þjáningum eða verulegum óþægindum".

Það var mat saksóknara og dómara að það gæti spillt fyrir málinu ef sakborningar og vitni gætu lesið fréttir hvert af annars vitnisburði. Ekki er vitað til þess að þessu ákvæði hafi verið beitt áður.

Verjendur sakborninga mótmæltu þessari ákvörðun dómsins og töldu að hún væri í ósamræmi við almennar réttarfarsvenjur.