Verjandi Annþórs taldi saksóknara vanhæfan

Héraðsdómur Reykjaness hafnaði í morgun kröfu Guðmundar St. Ragnarssonar, verjanda Annþórs Kristjáns Karlssonar, um að Karl Ingi Vilbergsson saksóknari í máli gegn Annþóri, Berki Birgissyni og félögum yrði úrskurðaður vanhæfur.

Með frávísunarkröfu sinni vísaði Guðmundur í fréttir af vefmiðlum frá 22. júní síðastliðinn þegar mál Barkar Birgissonar var fyrir dómstólum. Í málinu var Börkur Birgisson ákærður, og síðar dæmdur fyrir brot gegn valdstjórninni með því að hafa hrækt í áttina að dómara og kallað hana ónefnum. Þegar málið var til meðferðar kom maður inn í dóminn og rétti Berki úlpu með einhverskonar verkfæri. Börkur reyndi þá að losa sig frá lögreglumönnum og Guðmundur segir að Karl Ingi hafi þá lent í ryskingum við einn af ákærðu í málinu í dag.

Dómari telur hins vegar að ekkert hafi komið fram sem orsaki vanhæfi Karls Inga. „Er virðulegur dómari að segja að hæfi ákæruvaldsins skipti ekki máli?" spurði Guðmundur þá. „Við erum ekki að flytja mál um hæfi eins né neins" sagði Ástríður Grímsdóttir dómari þá.

Þriðji dagurinn í réttarhöldunum gegn Annþóri, Berki og félögum hófst í dag. Eins og fram hefur komið voru þeir ákærðir fyrir fjölmörg ofbeldisbrot. Þeir réðust á menn með kylfum og öðrum bareflum.

Þriðji dagur aðalmeðferðarinnar fer fram í dag. Þetta er fyrsti dagurinn sem aðalsakborningarnir, þeir Annþór og Börkur eru ekki viðstaddir.