Lýsing mátti reikna vexti miðað við erlenda gjaldmiðla

Héraðsdómur Reykjavíkur komst í morgun að þeirri niðurstöðu að samningur sem fyrirtækið Eirvík-Heimilistæki ehf. gerði í byrjun árs 2008 um fjármögnun á VW Caddy bíl væri í raun leigusamningur. Því hefði Lýsingu verið heimilt að binda vexti af þessum samningi við gengi erlendra gjaldmiðla. Ákvæði vaxtalaga um að óheimilt væri að reikna vexti út frá gengi erlendra gjaldmiðla ætti því ekki við í tilfelli þessa lánasamnings.

Eins og kunnugt er hafa fjölmargir lánasamningar verið dæmdir ógildir á forsendum vaxtalaga frá árinu 2001, en Lýsing hefur hingað til haldið að þeir dómar væru ekki fordæmisgefandi fyrir þau lán sem fyrirtækið hefði veitt.

Héraðsdómur segir að af  ákvæðum samningsins, sem þykja að öðru leyti skýr að mati dómsins, megi ráða að samið hafi verið um leigu stefnanda á bifreiðinni á ákveðnu tímabili gegn greiðslu mánaðarlegs gjalds. Í samningnum sé hvorki tiltekið kaupverð bifreiðarinnar né höfuðstóll samningsins en eðli málsins samkvæmt væri nauðsynlegt að þessi atriði kæmu fram ef um lánssamning væri að ræða.

Héraðsdómur segir jafnframt að í skilmálum samningsins komi hvergi fram að leigutaki eignist bifreiðina við lok samningstímans. Segir þvert á móti að leigumun skuli skilað að leigutíma loknum og liggur fyrir í gögnum málsins að bifreiðinni hafi verið skilað til stefnda, 3 mars 2011, sem síðan seldi hana áfram til þriðja aðila.

Ofangreint bendi meðal annars til þess að samningurinn sé leigusamningur en ekki lánssamningur.