Vilhjálmur segir sig úr stjórn Félags eldri borgara

Vilhjálmur Þ. Vilhjálmsson, sem hefur verið meðstjórnandi í stjórn Félags eldri borgara í Reykjavík síðastliðin tvö ár, hefur sagt sig úr stjórninni. Þetta gerir hann vegna þess að talið er að seta hans þar gæti skaðað hagsmuni félagsins og trúverðugleika. Fyrsti varamaður í stjórninni hefur tekið sæti hans.

Stjórn félagsins ræddi málefni hjúkrunarheimilisins Eirar á fundi í gær. Segir í tilkynningu frá félaginu að margir félagsmenn hafi eðlilega krafið stjórn félagsins um svör við því hvernig það muni bregðast við stöðu mála á Eir. Hlutverk FEB sé samkvæmt lögum þess að gæta hagsmuna eldra fólks í hvívetna og leggur stjórnin áherslu á að allt sé gert til að tryggja öryggi íbúarétthafa og þjónustu við þá sem búa á hjúkrunarheimilinu.

Þá segist stjórn Félags eldri borgara treysta því jafnframt að starfshópur, sem skipaður hefur verið til að finna lausn á þessu máli, geri það fyrst og fremst með hag íbúanna að leiðarljósi.