Stela jólaljósum á Akureyri - “Þetta er svo leiðinlegt“

„Ég vona að þessir ormar skili perunum því þetta er auka kostnaður fyrir bæjarbúa," segir Guðrún Björgvinsdóttir, yfirverkstjóri garðyrkjumála hjá Akureyrarbæ.

Fyrir tíu til tólf dögum síðan var jólaskraut sett upp í bænum, líkt og gert er í flestum sveitarfélögum þegar jólin nálgast. Í ár voru keyptar sérstakar sparperur í jólaskreytingarnar á frægu kirkjutröppurnar í bænum en þær hafa ekki fengið að loga í friði, því búið er að stela á þriðja tuga pera.

„Síðustu ár hafa óprúttnir aðilar brotið perurnar yfir hátíðarnar og því brugðum við á það ráð að kaupa sérstakar LED perur. Þær eru alveg rándýrar, eru óbrjótanlegar og eru mjög sparneytnar - og eiga að endast í nokkur ár. Það var lítið til af þessu og ég keypti upp lagerinn. Ég á núna bara þrjár auka rauðar perur og það er ekkert eftir á landinu," segir Guðrún augljóslega svekkt yfir þessum þjófnaði.

Og það er meira. „Við fengum rosalega fallega rauða kastara gefins til að hafa í Gilinu en þeir lýstu upp reynivið sem þar er. Og í byrjun september hurfu þeir. Þeir kosta tugi þúsunda. Þeir voru festir niður með stórum járnhælum en þeir sem tóku þá, voru búin að saga rörin í sundur og klipptu á snúrurnar," segir hún.

Guðrún er miður sín yfir þessu, enda lendir kostnaður við slík skemmdarverk alltaf á bæjarbúum. „Þetta er svo leiðinlegt. Maður er þvílíkt að vanda sig við að gera vel og spara bænum tugi þúsunda króna með því að kaupa flottar sparperur og svo er þeim bara stolið," segir hún.

Bæjarbúar eru hvattir til að hafa augun opin fyrir þjófunum og þá hefur lögreglunni einnig verið gert viðvart um þennan jólaljósaþjófnað á Akureyri. „Við viljum hafa bæinn okkar fallegan yfir jólin enda tími ljóss og friðar," segir hún að lokum.