Austurbæjarskóli vann Skrekk

Það var borgarstjórinn sjálfur, Jón Gnarr, sem kynnti sigurvegara kvöldsins á grunnskólakeppninni Skrekk nú í kvöld.

„Þetta er búið að vera alveg hreint rosalegur Skrekkur. Ég er stoltur og auðmjúkur að fá að vera borgarstjóri í borg þar sem býr svona mikið af frábæru fólki," sagði hann áður en hann öskraði nafn vinningsskólans og steig svo sigurdans með krökkunum.

Í öðru sæti keppninnar lenti Ingunnarskóli og Hlíðaskóli hafnaði í þriðja sæti.

„Frumleikinn og sköpunin er ótrúleg í grunnskólum Reykjavíkur," sagði Oddný Sturludóttir, formaður mennta- og menningamálaráðs hjá borginni, þegar hún tilkynnti hverjir hefðu hafnað í öðru sæti.

Dómnefndin var á einu máli um að atriðin hefðu hvert verið öðru betra og á því leiki enginn vafi að borgin sé „stútfull af ungu hæfileikaríku fólki". Dómnefndina skipuðu Tinna Gunnlaugsdóttir þjóðleikhússtjóri, Steinunn Birna Ragnarsdóttir tónlistarstjóri Hörpu, Lára Stefánsdóttir listrænn stjórnandi Íslenska dansflokksins Víkingur Kristjánsson leikari og Adda Rúna Valdimarsdóttir, Verkefnastjóri barnamenningar.

Úrslitakvöldið fór fram í Borgarleikhúsinu og kynnar kvöldsins voru Saga Garðarsdóttir og Oddur Júlíusson sem léku á alls oddi milli atriða.