Hátt í 800 höluðu niður 112 appinu

Rétt tæplega 800 manns höluðu niður 112 appinu, eftir að Neyðarlínan var sýnd á Stöð 2 á fimmtudagskvöld og fjallað var um appið hér á Vísi. "Þetta er stærsti dagurinn síðan að þetta fór í loftið, sem var einhvern tímann fyrr í sumar," segir Hreinn Gústafsson, framkvæmdastjóri hugbúnaðarfyrirtækisins Stokks, sem hannaði forritið. Hreinn var í viðtali við Reykjavík síðdegis á föstudag.

Í þættinum er fjallað um mann sem týndist uppi á Esju. Hann vissi ekkert hvar hann var staddur og heilmikil leit fór fram. Hann var orðinn mjög kaldur þegar hann loksins fannst. Í þættinum kom líka fram að nýja appið hefði breytt miklu því að smáforritið staðsetur menn úti í náttúrunni og kemur mönnum í samband við Neyðarlínuna.